"El maǵan ne beredi dep emes, men elge ne beremin", - dep ómir súrińder...

132

Sálemetsizder me, qurmetti oqyrmandar! Biz búgin Túrkistan oblysy, Otyrar aýdany, Otyrar aýylynyń týmasy, jeke kásipker Tólegen Qaırat Kádirbekulymen suhbattasatyn bolamyz.
- Sálemetsiz be, Qaırat aǵa?! Sizdi aýdandaǵy eń bedeldi kásipkerlerdiń biri dep estigen edik. Bizge suhbat berýge kelisimińizdi bergenińiz úshin alǵys bildiremiz. Suhbatymyzdy otbasyńyz jaıly maǵlumattan bastasaq. Neshe aǵaıyndysyzdar? Qazirgi tańda qansha balanyń ákesisiz?

- Sálemetsiz. Biz bir ákeden on birmiz. 5-ul, 6-qyz. Bir inim 2001 jyly qaıtys boldy, qazir onbyz. Qudaıǵa shúkir, qazir onymyz da Qazaqstannan oıyp turyp oryn alarlyqtaı azamat pen azamatshalarmyz. Qansha balanyń ákesisiz degenge keler bolsam, 5 balam bar, 2-ul 3-qyz. Úlken ulym 2018-jyly Ál-Farabı atyndaǵy Qazaq ulttyq ýnıversıtetin bitirip, bıyl úılendi. Odan keıingi qyzym ál-Farabı atyndaǵy Qazaq ulttyq ýnıversıtetiniń 4-kýrs stýdenti. 2-shi qyzym ál-Farabı atyndaǵy Qazaq ulttyq ýnıversıtettiń 2-kýrs stýdenti. 3-shi qyzym bıyl mektep bitiredi. Kenjetaıym 6-synypta oqıdy. Áıelim mektepte ustazdyq qyzmette jumys isteıdi.

- Kásipkerlikke qalaı keldińiz?

- Jalpy, sovet úkimeti kezinde ómir súrdik qoı endi. Sol sovhoz tarqamaı turyp, 30 gektar jońyshqa, 40 gektar júgeri egip, úlkenderdiń kózine ilikken jaıym bar edi. Sodan sol jerde biraz jumys jasadym. Keıin 25 jasymda otaý qurdym. Mal bordaqylap, etin bazarǵa aparyp satyp, kishigirim tirshilik etip júrdim. Árıne, endi ony bıznes deýge de kelmeıdi, kún kóris retinde sol kezderde solaı tirshilik jasaýǵa týra kelgen bolatyn. Odan soń sovhoz tarqap, halyqtyń jaǵdaıy kúrt tómendedi. Eldi jumyssyzdyq jaılady. Birshama ýaqyt ár túrli qurylys jumystaryn jasap júrdim. Biraq túptiń túbinde bir nárse ashý kerektigin oıladym. Halyq azyq-túlik alýǵa sonaý qalaǵa baratyn. Al qalaǵa baratyn jalǵyz avtobýs edi. Sodan oılana kele nege áleýmettik baǵada halyqqa arnap dúken ashpasqa dep táýekelge bel býdym. Eń aldymen un satyp bastadym. Kele-kele tutynýshy jınap azyq-túlikpen dúkendi toltyrdym. Mine, qazirde dúken ashqanyma 11 jyl bolypty. Árıne endi saýda bolǵan soń arasynda paıda da bolady, quldyraý da bolady. Barlyǵyna da shúkir etip kele jatqan jaıym bar.

- Saýdada bolsyn, sharýashylyqta bolsyn este qalarlyqtaı utylysyńyz boldy ma? Sol jaıynda aıta ótseńiz.

- Árıne, endi saýda bolǵan soń quldyraýlar bolyp turady. Biraq men olardy quldyraý dep emes úlken saladan kórinýge taǵy da múmkindik dep bilemin. Men tek saýdamen ǵana emes egin jáne mal sharýashylyqtarymen de aınalysamyn. Bir jyldary birtalaı gektar egin egip, sýdyń tapshylyǵynan bári qýrap qalǵany bar. Sol kezde kóp shyǵynǵa ushyraǵan edim. Biraq, shúkir etemin, aýyz toltyryp aıtarlyqtaı shyǵynǵa ushyramadym.

- Qazirgi tańda nemen aınalysyp jatyrsyz, bolashaqqa josparyńyz?

- Saýdany ary qaraı damytyp jatyrmyn. Bolashaqta úlken dúken ashý josparymda bar. Árıne, barlyǵy Allanyń qalaýymen.

- Qaırat aǵa, búgingi suhbatyńyz úshin úlken rahmet! Sońyńyzdan erip kele jatqan jastarǵa qandaı tilek nemese sóz aıtar edińiz?

- Jastarǵa aıtarym: "El maǵan ne beredi dep emes, men elge ne beremin", - dep ómir súrińder. Sizderge de kóp-kóp rahmet.
Aıta keterlik jaıt, Tólegen Qaırat Kádirbekuly jyl saıyn birtalaı otbasylardy aılyq azyq-túlikpen qamtamasyz etip júr. Sonymen qatar, áleýmettik jaǵdaıy tómen, kópbalaly otbasylardyń mektepke baratyn balalaryn kúzdik, qystyq kıimmen jáne de mektep jabdyqtarymen (sómke, dápter, kitap, t.b.) qamtamasyz etip otyr. Ara-tura aýdandyq, aýyldyq is-sharalarǵa demeýshi bolyp, aýdan jáne oblys ákimderinen kóptegen maqtaý qaǵazdary men alǵys hattar alǵan.

Suhbattasqan: Kádirbek Baljan
(Azamattyq bastamalardy qoldaý ortalyǵynyń tapsyrysymen "Týǵan jer" jobasynyń aıasynda jazyldy)

Pikirler