Jas mamandar týǵan jerine úles qosýda

194

Týǵan jer – asyl qazyna. Osy asyl qazynamyzdyń mereıin ústem etip, onyń damýyna úles qosyp jatqan qazaq jastarynyń sany jyldan jylǵa artyp keledi. Ál-Farabı atyndaǵy Qazaq ulttyq ýnıversıtetiniń fılologııa jáne álem tilderi fakýltetiniń 2019 jylǵy túlegi Arslanbaeva Ajar óziniń kıeli mekeni Mańǵystaýǵa oralysymen, Týrızm kolledjiniń jas mamany atanyp ta úlgerdi. Bıylǵy oqý jyly jas maman úshin qyzý bastaldy. Olaı deıtinimiz, zamanymyzdyń zańǵar jazýshysy Ábish Kekilbaevtyń 80 jyldyǵyna oraı 12 qazan kúni ótkizilgen mádenı-tanymdyq sharaǵa belsene qatysady. Jazýshymen áriptes bolǵan ádebıet jáne óner qaıratkerleri, sondaı-aq sheteldik ǵalym-zertteýshilerge Ajar óziniń bilgenimen bólisip, kelgen qonaqtarǵa Ábish Kekilbaevtyń ǵumyr joly men týǵan jerdiń tarıhyn túsindiredi.

Ajardyń aıtýynsha, merekelik shara jazýshynyń týǵan jeri Ońdy aýylynda ótkizilip, keıin Shetpe kentinde jalǵasyn tapqan. Mereıtoıǵa jıylǵan qaýym áýeli Qamysbaı Ata qorymyna zııarattap, quran baǵyshtaǵan. Sodan soń jazýshynyń týǵan aýyly Ońdydaǵy "Aı-Ana" eskertkishine gúl shoqtaryn qoıyp, Mańǵystaý aýdanynyń qurmetti azamattary quttyqtaý sózderin jetkizgen. Ábish shyǵarmashylyǵynan úzindiler oqylyp, "Aı-Anaǵa" arnalǵan án shyrqalyp, qonaqtar Ábish Kekilbaev bilim alǵan Ońdy orta mektebine de taban tirep, arnaıy uıymdastyrylǵan tanymdyq sharany tamashalaǵan. Asyldyń synyǵy, abyzdyń urpaǵy da osy toıdyń ishinde bolyp mereıtoıdyń sońynda atqarylǵan sharalarǵa sheksiz alǵysyn bildiredi.

 


Búginde týǵan jeri úshin áýlıe sanalatyn, onyń tuńǵıyq oıynan týyndaǵan tyń eńbektermen sýsyndap kele jatqan jas urpaqqa sóz kıesi men týǵan jer qadirin uǵyndyrýda óz úlesin qosyp júrgen Ajar sııaqty tálimgerlerimiz kóp bolǵaı degimiz keledi.

(Azamattyq bastamalardy qoldaý ortalyǵynyń tapsyrysymen
"Týǵan jer" jobasynyń aıasynda jazyldy)

Pikirler