S. Saýytbaı: "Eki azamatymyzdy alyp qalyp, álemge birligimizdi dáleldeıik!"

421

"Bár tamshy qanym bolsa da óz elimde tamsyn" dep pana surap kelgen Shyńjań qazaqtary Qaster Musahanuly men Murager Álimuly dál qazirgi tańda ShQO Zaısan qalasyndaǵy UQK Shekara qyzmeti ókilderiniń qolynda.

Coǵan oraı Atamekeni – Qazaqstannan ne azamattyq, ne bosqyn mártebesin ala almaǵan Shveııadaǵy Saıragúl Saýytbaı qos azamatqa halyq bolyp qoldaý kórsetýimizdi surady, dep habarlaıdy adyrna.kz ulttyq portaly.

Joldanǵan beıneúndeýde "jaýyz Qytaı Kompartııasy qazaq bolǵanymyzdy qylmys etýde. Sondaǵy eki baýyrymyzdy qorǵaýymyz kerek"- dep ashyna aıtty. 

Saıragúl Saýytbaı: "Beıbit zamanda jaýyz Qytaı Kompartııasynyń genoıd saıasatynyń qurbany bolyp, elim-jerim dep basyma qıyn kún týǵanda pana surap kelgen qasiretti bir ana edim. Ózderińizdiń baýyrlaryńyzǵa basyp, qorǵap-qoldaýlaryńyzbenen erkindikke jetip, otbasymmen, eki balammen qaıta bas qosyp otyrmyn. Meni osy baqytqa jetkizgen sizder. Endi mine, men kórgen sol jaýyzdyqqa shydamaı elim bar, jerim bar dep eńirep eki azamatymyz da kelipti. Jaýyz Qytaı kompartııasy qazaq bolǵanymyzdy qylmys etip, bizdi osy kúıge túsirip otyr. Sonda birese orystyń, birese qytaıdyń jaýyzdyǵyna kónip, únsiz ólip kete berýimiz kerek pe edi?! Eki baýyrym, qorǵaıdy dep senip kelip otyr. Onyń ústine sol jaqtaǵy baýyrlardyń aıanyshty taǵdyryn jetkizbek nıette. Men bul isterin asqan erlik dep baǵalaımyn. Arǵy bettegi 3 mıllıon halqymyz azaptalýda. Aınalaıyn halqym, Qytaı jala jabýdyń asqan sheberi! Eki azamatymyzdy qorǵap alyp qalyp, álemge eldigimizdi, erligimizdi, birligimizdi dáleldeıik!"- dedi.

Sondaı-aq, qandasymyz Shveııada túrli telebaǵlamalarǵa qatysyp, Qytaıdyń jaýyzdyǵyn áshkerelegenin málimdedi.

"Men Shveııaǵa kelgeli bir kúnde tynysh jatpadym. Ólimnen qoryqpaǵan men, sonda qytaıdan qorqýym kerek pe? Múmkin emes, janymdy Qytaı emes, Qudaı alady. Baýyrlarym, joǵalǵan maldyń da suraýy bolady. Qytaıdaǵy baýyr-týysyńdy túgende. Erteń ókinip qalmaý úshin, búgin áreket et" - dep, áńgmesin túıindedi.

 

"Adyrna" ulttyq portaly

Pikirler