Nazarbaev Toqaevtyń jumysyna aralasyp júrgen joq - Dáýren Abaev

309

Onyń aıtýynsha, osy másele arqyly halyqty dúrliktirgisi keletinder bar.

QR Aqparat jáne damý mınıstri Dáýren Abaev "Habar" arnasyndaǵy "Ashyq dıalog" baǵdarlamasynda Qazaqstandaǵy "qos bılik" qaýeseti jóninde pikir bildirdi, dep habarlaıdy adyrna.kz QazAqparat-qa silteme jasap.

Onyń aıtýynsha, osy másele arqyly halyqty dúrliktirgisi keletinder bar.

"Birqatar anonımdik kanaldar Qazaqstandaǵy "qos bılik" taqyrybyn ádeıi taratty. Mundaı resýrstardyń asyra siltep, ótirikti shyndaı etip kórsetkisi keletini túsinikti. Elbasy óz málimdemesinde bul joramaldardy joqqa shyǵardy", - dedi mınıstr.

Mınıstr Tuńǵysh Prezıdent Nursultan Nazarbaevtyń málimdemesinen birneshe tujyrym shyǵarýǵa bolatynyn aıtty.

"Birinshiden, Elbasy Prezıdent jumysyna aralaspaıdy. Munyń barlyǵy konstıtýııalyq normalarmen mejelengen. Ekinshiden, Toqaev – ekinshi Nazarbaev emes, onyń óz basqarý stıli, óz kózqarasy bar. Sondyqtan, jańa Prezıdent óz jumysynda jańa format qoldanǵan saıyn "qos bılik" týraly shý kóterýdiń qajeti joq. Úshinshiden, Elbasynyń ózi de, Qasym-Jomart Kemeluly da mańyzdy másele jóninde keńesip otyratyndaryn aıtty. Ne degenmen, Nursultan Ábishulynyń tabysty el basqarýdaǵy tájirıbesi mol. Oǵan ózge memleketterdiń de kóshbasshylary keńes surap júginedi, muny men anyq bilemin", - dedi D.Abaev.

Aıta keteıik, 11 qazanda QR Tuńǵysh Prezıdenti – Elbasy Nursultan Nazarbaev Qazaqstanda "qos bılik" týraly qaýesetke negiz joq ekenin málimdegen bolatyn.

"Mundaı tujyrymǵa esh negiz joq, sebebi Qazaqstan prezıdenttik basqarý formasy bar ýnıtarly memleket. Men jol kórsetemin, ózderi keńesedi, keńes beremin, suramasa – keńes bermeımin (kúldi). Óz Otanyma, óz elime qyzmet etýdi jalǵastyryp kelemin", - dep jaýap berdi Nursultan Nazarbaev jýrnalıst suraǵyna.

Pikirler