Qytaıdan qashqan qos qazaq satqyn emes pe?!

444

Qytaıdaǵy qazaqtardyń qamyn jep kelgen qandastarymyzdy túrmege jabý bizdiń ádetimiz emes pe?! Kúni keshe ǵana "bir tamshy qanym bolsa da óz jerimde tamsyn" dep pana surap kelgen Qaster Musahanuly men Murager Álimulyn shekara qyzmeti ustap áketti. «Pana bolamyz» degen "Atajurt eriktileri" uıymynyń ózi "arnaıy qyzmet ókilderin bir mınýtqa da toqtata almadyq" dep qaýqarsyz qaldy.

Rasymen Saıragúl isinde de osy jaǵdaı qaıtalanǵan. Alaıda sońy ózgeshe órbigen edi. Búkil qazaq namysqa tyrysyp júrip, shyryldaǵan qyzymyzdy Eýropanyń qorǵaýyna ótkizip baryp "ýh" degenbiz. Al endi bul is qaıta qaıtalanǵanda qolymyz baılaýly qalyp, qoǵam ekige jaryldy.

Bul jóninde jýrnalıst Toqtar Jaqash: "Eki jigitti qorǵaý úshin Astanadan Lázzat Ahatova arnaıy ushyp keldi. Belgili advokattar Baýyrjan Azanov pen Shynqýat Baıjanov ta baýyrlaryna arasha túsýge kiristi. Qytaıǵa keri qaıtarylsa - Qaster men Muragerdiń ekeýin de aıamaıdy»- dese, Jaras Kemeljan: "Arqa jaıly bolsa, arqar aýyp nesi bar? Saıragúldi qytaıdaǵy qazaqtar múlde bilmeıdi. Ony jaqynda kelgen týystarymnan suradym. Tipti, bir aýdannan kelgen kisiler de habarsyz" dedi. Tipti, keıbireýleri "Qytaıda otbasylaryn tastap, óz qara bastaryn kúıttep kelgeni qyzyq eken. Agent bolýy yqtımal" dep kúdikpen qaraýda.
Endi búkil qazaq kókeıinde «eki azamattyń taǵdyry ne bolady?» degen bir ǵana suraq tur. Birneshe nusqalaryn usynyp kóreıik.

A) Aspan asty eliniń quzyrly organdaryna kereksiz shulyqtaı laqtyryp kep jiberemiz. Alaıda birnárseni este ustaǵanymyz lázim. Dármensiz qos qandasty, otbasymen qosa ólimniń aýzyna ózimiz aıdaımyz.
Á) Ǵaıyptyń kúshimen hám prezıdentimiz Toqaevtyń aralasýymen, el bolyp, jurt bolyp jumylyp, Qazaqstanda alyp qalamyz. Eger bundaı quziretke qol jetetin bolsa, rasymen jaraǵanymyz!
B) Saıragúldiń sara jolyn qaıtalap, Shveııaǵa ıakı Qytaıdan ózge kez kelgen memlekettiń birine jiberemiz. Áıtkenmen, ár qashqyndy shetelge attandyra bersek, jany ashyp, qýana qarsy alatyn qaısy el daıyn tur, degen suraq taǵy týady.

Qysqasy, qazaqtar qıly-qıly zaman keshkende qysyq kózden ımený bylaı tursyn, baýyrym degendi bosaǵada da qaldyrmaǵan. Óz janynyń amandyǵyn emes, Qytaıdaǵy bar qazaqtyń qamyn jep kelgender úshin, qan úshin kúıe almasaq qazaq bolyp nesine otyrmyz?! Qorlyq kórgen adamdy korlyq kórsetken elge qaıta jiberý namyssyzdyǵymyz ben uıatsyzdyǵymyzdyń dáleli. Sondyqtan, Saıragúlge shyryldaǵannan kem túspeı, qalyń qazaq qaýymy qos azamatqa arasha túsýge tıispiz!

Aqgúl AIDARBEKQYZY

"Adyrna" ulttyq portaly

Pikirler