Qazaqstandaǵy grant bıznesi nemese saýdager ustazdar

514

(QR Bilim jáne ǵylym mınıstri Ashat Aımaǵambetovke ashyq hat)

Oqýdyń bastalǵanyna 2 aıdyń júzi bolsa da, magıstratýranyń muńy áli de jas bitkenniń janyn qajap júr. Testten tómen baldy enshilep ıakı test tapsyrý barysynda aýdıtorııadan akt jazylyp shyǵyp ketkenderdiń jóni bir bólek. Grant alyp-satarlaryna aldanyp, barmaǵyn tistep qalǵan jastardyń jaǵdaıy qıyn bolyp tur. Ol qalaı deseńiz, talapkerler tómen ball alyp, zar eńirep júrgende ózderin «mınıstrliktenbiz» dep tanystyrǵan «qutqarýshy perishteler» aspannan salbyrap túse qalady. Qazaq kóringenge sengish halyq emes pe?! 500 myń men mıllıonǵa deıingi suraǵan aqshalaryn nesıe alsa da, qaryzdanyp-qaýqalansa da, súrinip júrip taýyp, qaltalaryna qystyrady. Ańqaý elge aramza molda bolǵan «mınıstrliktegiler» qolhat ta jazyp bermeı, «kút» degen bir-aq aýyz sózben qutyla salady. Kútýdiń dáýreni 5,10, 30 tipten 2 aıǵa deıin sozylady. Kúte-kúte shydam da, aıta-aıta aýyz da sharshaıdy. Úmittiń jetegi adamǵa tynyshtyq bersin be?! Kún saıyn «tústiń» degen ýnıversıtetti jaǵalap, bolashaq grýppalastarymen emen-jarqyn dıdarlasýdy ańsap júrgen talapker oqý ornynyń esiginen ǵana syǵalap qaıtady.

Qatarlastarymen qosa shabýdy armandap júrgen jastyń basyndaǵy qıyndyq túsingen janǵa aýyrdyń aýyry. Osylaısha kúnde erteńge aldanyp, jalǵan úmitpen kún keship júrgen bolashaq magıstrant bir-aq kúnde bomba bolyp jarylady.

«Mınıstrliktegilerge» habarlasyp, «grant satylady dep aldap aldyńyz da oqýǵa túsirmedińiz, endi aqshamyzdy qaıtaryńyz. Qaıtarmaǵan jaǵdaıda fınpolǵa habarlaımyz» degen kezde ǵana qoldarynan kelmeıtinin moıyndaǵan. Bul jóninde aty-jónin berýge úzildi-kesildi bastartqan jábirlenýshi jas bylaı dep málimdeıdi. «4-kýrsymda ákem qaıtys bolyp, basymnan túrli qıyn jaǵdaılar ótti. Sonyń saldarynan magıstratýraǵa daıyndalýǵa múmkinshilik bolmady. Men úshin oqý bolmasa ómir toqtap qalatyndaı edi. Ózge qatarlastardan da qalǵym kelmedi. Aqyry grantty satamyn dep murnymnyń astyna kep turǵan soń, berilgen múmkindik dep oıladym»,-deıdi. Al zańgerden zańdy turǵyda aqyl-keńes surap edik. «Bul jerde grantty satyp alýǵa nıettengen jasqa da, satqan azamatqa da Qazaqstan Respýblıkasy Qylmystyq kodeksindegi 366-bap boıynsha aıyp taǵylady» dep jaýap berdi.
Qalaı bolǵan kúnde de, Memlekettik grantty saýdaǵa salyp qoıǵan hám baqylaýda ustamaǵan bıliktegilerdi sútten aq, sýdan taza dep esepteý qate pikir.

Osy oraıda QR Bilim jáne ǵylym mınıstri Ashat Aımaǵambetovten grant satýshylarǵa tosqaýyl qoıý sharalaryn júrgizýin ótinip suraımyz!

 

Aqgúl AIDARBEKQYZY

"Adyrna" ulttyq portaly

Pikirler