I. Ábishev isi. Sybaılas jemqorlyq agenttiginiń ózi jemqor ma?!

692

Eldegi myqty ári bilikti menedjerdiń biri Islam Ábishtiń ne úshin qamaýǵa alynǵany endi tolyǵymen túsinikti bolyp kele jatyr. Sybaılas jemqorlyqqa qarsy kúres ulttyq bıýrosynyń jandaıshaptary bul sharýany ábden daıyndalyp baryp, qolǵa alǵany kózge anyq kórinip keledi. Jemsaýy jemge tolǵan, bıik aqyrdan jem jep úırengender o basta myqty menedjerdiń jaýapty orynda otyrǵanyna múddeli bolmaǵan. Ne úshin? Sebebi, myqty menedjer memlekettiń aqshasynyń talan tarajǵa túsýine jol bermeıtinin olar biledi. Sol sebepti, eshqandaı dálelsiz, «Para alýǵa oqtaldy» degen jalań ispen ǵana ustap otyr. QR sybaılas jemqorlyqqa qarsy kúres (SJQK) Ulttyq bıýrosynyń árbir qadamdarynda qazirgi ýaqytta birin biri taǵaıyndaý men birin biri aýystyrý boıynsha shahmattyq oıyndar ótip jatyr. Munyń bári Islam Ábishtiń isimen baılanysty ekeni anyq. Orynnyń kimderge kerek bolǵanynyń bári túsinikti. Ony Islam Ábishtiń advokaty, belgili zańger Abzal Quspannyń aıtyp otyrǵanynan kórip otyrmyn. Endi bular Abzal Quspannyń sońynan da shyraq alyp túsipti. Al, Dáýren Abaev Qazaq kúresi federaııasyna ne úshin kelip otyr? Munyń túbinde Islam Ábishtiń isi qoǵamda rezonans bolyp ketpeýi úshin aqparattyq turǵyda aldyn alý maqsatynda jasalǵan sııaqty.
Islam Ábish jalǵyz ǵana memlekettik qyzmetker emes, Dúnıejúzilik qazaq kúresiniń álemdik arenada boı kórsetýine de yqpal etken tegeýrindi azamat. Onyń arqasynda Qazaq kúresi sońǵy 15 jylda buryn jetpegen bıikke kóterilgen. Al, 2016 jyly qazaq kúresin IýNESKO halyqaralyq uıymy adamzattyń mádenı muralarynyń tizimine engenine bul azamattyń eńbegi sińgen. Osy eńbegi joǵarydaǵy bireýlerdiń ishin kúıdirip bara jatyr. Basqa qandaı jetistik kerek...

Al QR sý resýrstary komıtetiniń basshylyǵyna kelgende memlekettiń mıllıardtaǵan qarajatyn únemdep, josparly túrde jumystar jasaǵany óz aldyna úlken dúnıe. Sý resýrstary komıtetinde respýblıkalyq mańyzdy sý jınaý nysandarynyń barlyq tetikterine deıin zerttep, taldaý jasap, óte sheber ınjenerlik esepteýler júrgizgen. Qaı jerde ne isteý kerek ekenin anyq bilip otyrǵan. Sonyń arqasynda memlekettiń mıllıardtaǵan qarajatyn únemdep otyrǵan. Al, endi osyndaı bilikti kadr ne úshin negizsiz qamaýǵa alynyp otyr? Jaýap jalǵyz ǵana – qazaqtyń ulttyq kadrlarynyń jumys jasaýyna múddeli emes toptar bizdiń bılikte otyr. Bir baıqaǵanym, Islam aǵamyzdy qarsy tutqyndaýshy tarap naqty qylmysty negizdermen aıyptap, jasaǵan qylmystaryn tizbelep bere almaı otyr. Eger olardyń naqty qylmystyq iske qatysty derek bolsa, onda bitti deı berińizder. Búkil BAQ tyń bárine jańalyq ashqandaı aıtar edi. Al, bular aıta almaı otyr. Naqty qylmystyq faktilerge negizdelgen aqparattardy qoǵamǵa ashyq túrde jarııalaı almaı otyr. Oǵan shamalary jetpeıdi. Bul kisi túrmede otyryp, búkil eldiń sý resýrstary men nysandaryna baılanysty málimetterdi ashyq, naqty aıtyp, kózderiń jetsin dep elge esep te berýde. Ózine nyq senimdi. Qaı jerde memlekettiń qansha qarajatyn jumsaǵanyna deıin el aldynda aıtyp jatyr. Men ol kisiniń isi boıynsha qoǵamda dúrligý men rezonans bolyp jatqannan soń, ret retimen qarap kele jatyrmyn. Qarsy taraptyń eshqandaı negizderi de joq. Munyń báriniń aq qarasy aldaǵy ýaqytta bári qoǵamnyń aldyna shyǵaıyn dep tur. Bul jerde bar bolǵany myqty, bilikti menedjerdiń jolyn kesý, bilikti azamatty jaýapty orynǵa jolatpaı kózin qurtý, memleketten bólingen mıllıardtarǵa aýyz salyp, ózara bólisý, osy kisiniń osy ýaqytqa deıin jasaǵan eńbegin ıelený ǵana bolyp tur. Bul bizdiń jaǵdaıdaǵy bılikke qaýipti bolsa da úırenshikti bolyp ketken.

Bizdiń elimiz sońǵy ýaqyttarda adam aıtqysyz ulttyq kadrlyq daǵdarysqa ushyrap jatyr. Jemqorlyq shash-etekten jaılaǵan eldiń bári de kadrlyq tapshylyqqa tap bolady. Eldiń ekonomıkasynyń qulap, ál-aýqatynyń tómendeýi de Islam Ábish sııaqty bilikti menedjerlerdi qýǵyndap, myqty kadrlarǵa jol bermeýden shyǵyp otyr. Esi durys el bolsaq, bilikti kadrlardy ózderiniń jastaryna úlgi etip kórseter edi. Órkenıetti elderdiń ustanymy, júrgen joly da osy. Sebebi, ulttyq memlekettiń irgesin ult kadrlary ǵana qura alady. Bolmasa qurıdy. Mundaı bilikti azamattardy buqara qamaýdan qutqarmasa, bizdiń ulttyq memleketimizdiń boıyna eshqashan da qan júgirmeıdi. Sebebi, bizdiń basqa da birneshe bilikti menedjerlerimiz qamaýda otyr. Olardyń ornyna kosmopolıttengen, ultsyzdanǵan, qaǵynan jerigen, qazaqtyǵynan taıǵan teksizder qazaqtyń baryn alyp, asyna túkirip jatyr. Tipti, bular bilimi bolsa da bizdi qurdymǵa jiberedi. Jaqsylyqtan úmitimiz bar elmiz. Jaqsylyqtan úmitimiz bar ultpyz. Bolashaǵymyzdy sol úshin únemi jańashyldyqpen baılanystyryp otyrmasaq, dál qazirgi aýmaly-tókpeli zamanada biz aǵynmen boılap qana ketip jatyrmyz. Meniń janyma batatyny – memlekettiń qarajatyn únemdep, saýatty jumys jasaǵan kadrlardy bizdiń qoǵam asa sezimtaldyqpen qabyldaı almaýda. Sebebi, qazirgi júıede elge baryn salyp qyzmet etetinin azamattardyń eńbegi kózge múldem kórinbeı qalady. Azamattaryńa arasha bol, Qazaq eli!

Bekbolat QARJAN, "Adyrna" ulttyq portaly

Pikirler