AÝYLYNA QARAP, AZAMATYN TANY!

135

“Týǵan jer” shyǵarmashylyq baıqaýyna qatysýshylardyń týyndylaryn paraqshamyzǵa jarııalaýdy bastadyq. Kelesi kelip túsken týyndy «Úzdik maqala» atalymy boıynsha Qartaıǵan Erǵalı Ashatuly.

 

Baılanys telefony: 8747 409 41 94

Jalpy kóbine-kóp, ásirese, óner qaıratkerleri, ánshi nemese saıası belsendiler jurt jadynda jyldam jattalyp, tarıh dápterinde esimderi altyn áriptermen jazylyp jatatynyn bilemiz. Al eńbek pen beınettiń arqasynda kelgen bedelmen mundaı abyroıǵa jetý qıynnyń qıyny. Deıturǵanmen de búgin tańda osyndaı údeden shyǵyp júrgen jigerli jandar da bar. Kıeli Áýlıeata óńirinde ornalasqan Shý aýdanyndaǵy Belbasar aýylyn el-jurt qaı kezde de birligi tarqamaǵan berekeli aýyl retinde tanyǵan. Berekeli dep ekpin túsirip aıtýymyz da beker emes. Aýdandaǵy jalǵyz tirek aýyly sanalatyn belbasarlyqtardyń búgingi isine qarap, súısinbeske amalyńyz qalmaıdy. «Aýylyna qarap azamatyn tany» degen sóz bar qazaqta. Rasymen de týǵan topyraǵynan jyraqta júrse de óziniń týyp-ósken aýylyn óz baspanasyn qamdaǵandaı kem-ketigin túgendep, jyrtyǵyn jamap, turmysyn bazarly etýge bar kúshin jumsaıtyn azamattar bolady. Tıisinshe, bundaı aýyldan berekeniń tarqamaıtyny da belgili. Mine, osyndaı azamattardyń biregeıi retinde Shý aýdanynyń Qurmetti azamaty Bolat Saýranbaevty atap ótýge bolady.
Ol shalǵaı óńirlerde jaýapty qyzmetterdi atqara júrip, ózi týyp-ósken Belbasar aýylynyń áleýmettik órkendeýine ólsheýsiz úles qosyp keledi. Bolat Ospanulynyń qajetti jerde aýyldastarynyń ıgiligi úshin jasalatyn kez kelgen ortaq iske demeýshilik tanytýdan da tartynyp qalǵan tusy joq. Qaltasy qalyńdasa júris-turysy ózgerip shyǵa keletin áldekimderge qaraǵanda, kerisinshe jerlesterinen onyń tabıǵaty múlde bólek ekenin estısiz. Olaı bolmaǵanda she? Mańdaı terimen tapqan aqshasyn ımandylyq ordasynyń boı túzeýine jumsap, alaqandaı aýylǵa záýlim meshit salyp bergen Bolat Saýranbaevqa aýyldastarynyń alǵystan basqa aıtary joq. Odan qala berdi aýyldaǵy ábden tozyǵy jetken fýtbol alańshasyn tolyǵymen súrgizip, kólemi 50-100 metrdi quraıtyn, sońǵy úlgidegi jasandy jabyny bar úlken stadıon salyp, ony aýyl mektebiniń menshigine ótkizdi. Qazirgi tańda munda fýtbol úıirmesi ashylyp, arnaıy bapker de bólingen. Shý aýdanynda ótetin aıaq dop jarystarynyń barlyǵy da dál osy aýyldaǵy stadıonda uıymdastyrylyp júr.
Taǵy bir aıta keterligi, ótken jyldyń kókteminde aýdan turǵyndary taǵy bir tarıhı sáttiń kýási boldy. Tikeleı Bolat Saýranbaevtyń muryndyq bolýymen boı kótergeli jatqan «Belbasar» mádenı-sporttyq kesheniniń qazyǵy qaǵylyp, alǵashqy tasy qalandy. Sonymen qatar, turǵyndarǵa sport kesheniniń jobasy da tanysytyryldy. Eki qabattan turatyn nysannyń jalpy kólemi 2696 sharshy metrdi quraıdy eken. Keshenniń tómengi qabatynda ornalasatyn ámbebap sport zalda kelýshilerge kishi fýtbol, volleıbol jáne basketbol oıyndaryn oınaýǵa múmkindik bar. Al ekinshi qabatta boks, kúres jáne aýyr atletıka zaldary bolmaq. Mundaǵy qurylys jumystaryn da elimizge belgili «SHEBERBUILD» qurylys kompanııasy júrgizetin bolady. Osy oraıda atalmysh kompanııany dál osy Belbasar aýylynyń týmasy Bolat Saýranbaev basqarady. Qazirgi kezde soǵylyp jatqan keshen aıaqtalýǵa jaqyn qaldy. Mundaǵy qurylys jumystaryna Bolat aǵamyz aýyldyń jergilikti turǵyndaryn tartty. Mine, dál qazirgideı saǵat turmaq sekýndtyń ózi esepteýli shaqta qanshama jannyń nápaqasyn taýyp berý kez kelgenniń qolynan kele bermeıtin erlik desek ásirelegenimiz emes. Bolat Saýranbaevtyń aıtýynsha, «Belbasar» sport kesheniniń ákimshilik bólmesi men sportshylardyń kıim aýystyratyn jáne jýynatyn bólmeleriniń barlyǵy da halyqaralyq standartqa saı bolmaq. «Bizdiń bala kezimizde aýylda mundaı sport zal tek arman bolatyn, ol qazirgi aýyl balalarynyń da armany ekenin bilemiz. Sondyqtan, aýyldastarymyzǵa kómek bolsyn dedik. Qurylysy júrip jatqan úlken nysanǵa qomaqty qarjy jumsaıtynymyz belgili. Soǵan baılanysty, «Hatı Saýranbaev» atyndaǵy qordy qurdyq. Aldaǵy ýaqytta kez kelgen azamat óz shama-sharqynsha qurylǵan qorǵa qarjy sala alady. Osy tusta, nysannyń qurylysy tolyǵymen aıaqtalǵan kezde elimizge belgili birqatar azamattar qoldaý bildiretindikterin aıta ketken jón. Máselen, elimizdiń dańqty boksshysy Serik Qonaqbaev keshenniń ashylý saltanatynda halyqaralyq standartqa saı rıngti barlyq qural-jabdyǵymen birge syıǵa tartatynyn jetkizse, bokstan Sıdneı Olımpıadasynyń jeńimpazy Ermahan Ibraımov aldaǵy ýaqytta osy keshennen olımpıadaǵa daıarlaý ortalyǵynyń fılıalyn ashýdy josparlap otyr. Sondaı-aq, «Qaırat» fýtzal klýbynyń prezıdenti Qaırat Orazbekov shaǵyn fýtbol alańshasyn jabdyqtaýdy tolyǵymen óz moınyna alatynyn jetkizdi» - deıdi Bolat Ospanulynyń ózi.
Baıqaǵanymyzdaı, Belbasar aýyly aýyzbirshilikke uıyǵan, qazynaly qarty, jalyndy jasy bar, ózderi qalyptastyrǵan jaqsy iske jurt bolyp jumyla ketýdi sabaqtasqan saltqa aınaldyrǵan aýyl. Jyraqta turyp-aq, irgeli jumystyń tizginin ustaǵan nemese kásibiniń tasyn órge domalatqan aýyl túlegi týǵan aýylyna qaıyrylyp, bar-joǵyn túgendeýge muryndyq boldy. Izgi iske uıytqy bolǵan azamatqa jergilikti ákimdik pen turǵyndardyń atynan alǵys aıtylyp, qurmet te kórsetildi. Belbasardaǵy kópke úlgi bolar istiń bári de aýyldyń ajaryn taıdyrmaı, berekesin saqtap otyrǵan Bolattaı azamattardyń jigeri bolsa kerek-ti. «Uly adamdar tirliginde óz beınesin ózi somdaıdy, al tuǵyrǵa keıingi urpaqtary ornatady» degen sóz bar. Sol aıtpaqshy, maqala keıipkeri Bolat Saýranbaev shynynda da búgingi kúnniń ózinde halyqqa bererin bere bilgen, óz beınesin ózi somdaǵan, úlken is tyndyrǵan aıtýly azamat. Eń bastysy, ol jerlesterine adal qyzmet etti, al aýyldastary súıikti perzentiniń elge jasaǵan eńbegin erekshe baǵalap, basyna kóterip qurmet tutýda.
Árbir adamnyń týǵan jeri, aýyly – jer betindegi eń qadirli meken ekenin eshkim de teriske shyǵara almas. Ien dalada elegizip qarap turatyn shaǵyn aýyldar tól týmasyn úlken arnaǵa qosatyn uly qasıetin áli de joǵalta qoıǵan joq. Yrysy qos elge yrzyq bolǵan(Qazaq pen Qyrǵyz) Shý ózeniniń belin basa ornalasyp, tarıhı tulǵalar týyp-ósip tanylǵan, ulttyq salt-dástúrimizdiń qaımaǵyn qalqyp alarlyqtaı uıyp turǵan, ulyqty jerdiń biri Belbasar da óziniń tól perzentterin úlken arnaǵa qosqan meken. Sol perzentterdiń biregeıi, biz joǵaryda atap ótken Bolat Saýranbaev ekeni sózsiz. Jasyratyny joq, qazirgi kezde aýyldyqtardyń deni berekeli momaqan daladan ııý-qııýy mol, dańǵaza qalaǵa ketýge qumartyp turady. Al, aýyldy jerdi ógeısinbeı, týǵan jerdiń tútinin túzý tútetýdi jón kórgen aýyl azamattary tym sırek. Solardyń da aldyńǵy qatarynda Bolat aǵamyz turǵandaı kórinedi. Qalaı degende de aýyly úshin aıanbaı eńbek etken arda azamattar eleýsiz qalmasa deımiz.

Pikirler