BIZDIŃ KÓShE

71

“Týǵan jer” shyǵarmashylyq baıqaýyna qatysýshylardyń týyndylaryn paraqshamyzǵa jarııalaýdy bastadyq. Kelesi kelip túsken týyndy «Úzdik poezııa» atalymy boıynsha Ádilet Orynbasarov.

Saǵyný da...
Ańsaý shyǵar tegi bul,
Ketkennen soń armandarǵa erip ul.
Úzdim neshe kóz jasymdy sony oılap,
Bizdiń kóshe- bólek álem edi bir.

Óleńimnen saǵynysh kúı sál ańǵar,
Ómirime óleń oılap tabam dál.
Ár kesede peıil tunǵan,
turady,
Tar kóshede kóńili keń adamdar.

Anaaý jerde topyraqty shashyp em,
Anaaaý jerde kórshi apaıdan qashyp em.
Túsingenim,
Alystaǵy týǵannan,
Jaqyndaǵy kórshiń artyq rasymen.

Saǵynyppyn.
Kesh túsindi sony aqyn,
Tentek bolyp shyqqan jer ǵoı mol atym.
Túske deıin tynysh jatqan bul kóshe,
Tústen keıin azan-qazan bolatyn.

Áńgime aıtyp, jınaıyn dep kúsh, talap,
Nemeresin tysqa qaraı nusqap ap.
Árbir úıden bir-bir áje shyǵatyn,
Qoldaryna bir kórpeden ustap ap.

Oralmas sát aýyrtady jandy aıqyn,
Ájeler-aı,
Kóńilderi qardaı tym.
Saıasat pen serıaldy aıtqan sol toptan,
Ótken-ketken adam da tys qalmaıtyn.

Balalar máz.
Toq zamanda toq týyp,
Tilderi de baldaı ári otty, ýyt.
Bir top qyzdar jasyrynbaq oınap júr,
Bir top bala barady áne dop qýyp.

Qazir maǵan osy ýaqyt eń eski,
Eń eski de...
Saǵym kezeń, kómeski.
Bir top erkek - aıtqandary fýtbol da,
Bir top áıel- shaqqandary shemeshki.

Balalyǵym!
Janymdy árkez qajaıdy,
Sol kóshede ótkizgesin az aıdy.
Jyldar saldy kóshemizge ózgeris,
Ájelerdiń sany biraz azaıdy.

Ras bolyp tur ájem aıtqan deregi,
"Báldý-báldý bári ótirik" degeni.
Dop qýatyn balalardyń ornyna,
"Kompıýterbas" sábı ósip keledi.

Bizdiń kóshe!
Bólek álem-rasyn uq.
Sol kóshede shattyq qaldy shashylyp.
Kóshemizge asfalt salyp tastapty,
Bal sátimniń izin túgel jasyryp.....

Pikirler