Qazaqstanda kópbalaly analarǵa arnaıy kvota bólinedi

313

Kópbalaly, tolyq emes, múgedek bala tárbıelep otyrǵan otbasylar, "Altyn alqa", "Kúmis alqamen" marapattalǵan analarǵa bilim granty bólinýi múmkin

Mınıstrlik halyqtyń áleýmettik osal toptaryn qoldaý maqsatynda kópbalaly, tolyq emes, múgedek balalardy tárbıelep otyrǵan otbasylar, "Altyn alqa", "Kúmis alqamen" marapattalǵan analar úshin bilim grantyn berý boıynsha kvota bólýdi kózdep otyr.

"Kópbalaly analar úshin arnaıy kvota bolady dep josparlap otyrmyz. Eger olar joǵary bilim alý úshin oqýǵa túskisi kelse, olarǵa kvota bólýimiz kerek. Qazir masyldyqqa jol bermeý, jumysqa tartý jaıly kóp aıtyp júrmiz ǵoı. Osy turǵydan alǵanda, bul mańyzdy is-shara dep oılaımyz", - dedi Aımaǵambetov májiliste "Pedagog mártebesi týraly" zań jobasyn tanystyrý kezinde.

Aıtýynsha, kvota bólý kezinde konkýrstyq irikteý qaǵıdaty saqtalady. Munyń bári zań jobasy depýtattar tarapynan qoldaý taýyp, qabyldanǵan jaǵdaıda ǵana iske asady.

Budan bólek, mınıstr bala quqyqtaryn qorǵaý tetikterine de toqtaldy. Ol Elbasy Nursultan Nazarbaevtyń azamattyq forýmda bala asyrap alýǵa qatysty bergen tapsyrmasyn eske saldy.

"Bizdiń usynysymyz agenttikter jaıly. Endi bala asyrap alardyń aldynda, ony óz qamqorlyǵyna alatyn adamdar mindetti túrde tıisti daıyndyqtan ótýi kerek. Óıtkeni, qazir baıqap otyrǵanymyzdaı, bala asyrap alǵannan keıin, olardyń 10-11 paıyzy qaıtadan qaıtyp kelip jatady. Bul óte qıyn jaǵdaı. Sondyqtan osy ınstıtýttardy qoldanýymyz kerek dep sanaımyz", - dedi ol.

Aımaǵambetov bala asyrap alý agenttikteriniń halyqqa tegin qyzmet kórsetetinin atap ótti.

 

Sputnik Qazaqstan

Pikirler