Bılik qazaq azamattarynyń baǵyn baılady

405

El tanıtyn bir aǵamyzdyń úıine baryp, únemi áńgime qylyp otyramyn. Jany taza, adam balasyna tek dostyq peıilmen qaraıtyn aǵam:
-Bizdiń ómir tekke ótip ketti ǵoı,-dedi.
-Nege?-dedim.
-Biz otyz jyl boıy osy qarysyp, qatqan, irip shirigen júıeniń jumysy toqtaıdy, Nazarbaev ketetin shyǵar dep kúttik,-dedi.
Men aǵama:
-Nazarbaev sizder túgili jap jas bizderdi de qartaıtyp jiberetin túri bar,-dedim.
-Bizdiń o basta elge adal qyzmet etetin nıetimiz bolǵan, biz bularmen alystyq, tartystyq, jarmastyq, qaǵystyq, biraq biz aqyr sońynda eshqandaı da jerge qyzmetke tura almaı, elge qyzmet ete almaı, boıymyzdaǵy bar potenıalymyzdy joǵalttyq. Biz ne uttyq? Biz utylǵan býynbyz,-dep, aǵamyz muńyn aıtyp, únsiz otyryp qaldy.

Osynda elge belgili bir azamat maǵan:
"Sen bas kóterip, uıymdastyryp shyǵasyń. Barlyq taktıkalyq qadamdaryńdy jasaısyń. Eldik múddeni kóteresiń, tildiń, jerdiń máselesin, áleýmettiń máselesin kóteresiń. Aqyry sońynda sen qamalasyń. Sonda seni baryp, túrmeden tartyp alatyn adamdar artyńda tur ma? Sen sony oıladyń ba? Qamalyp ketip jatyr ǵoı anaý jigitter. Al, sen artyńda osy azamat bar eken dep tartyp alyp shyǵaryp alatyn qoǵamyń bolmasa, kim úshin túrmege qamalyp kettiń"-dedi.

Mynaý júıe men Nazarbaev bıligi qazaqtyń naǵyz júrekti azamattary men adal uldarynyń baǵyn baılap, ıtjekkenge aıdap tastady. Qazaqtyń ultyna adal azamattarynyń táýelsizdiktiń ashyq tańynda baǵy baılanyp, aıdalyp, túrmelerde otyr. Júıeniń eń sońǵy etaptarda jumysy júrip jatsa da, bas kóterer arda azamattarǵa aıaýshylyq tanytatyn túri joq. Sonyń biri Jákishev. Ol sııaqty ǵylym men tehnologııanyń, uıymdastyrýshy ári tehnokrat azamat bizde dál qazir saýsaqpen ǵana sanarlyq. Órkenıetti elder Jákishev sııaqty ulyn aspanǵa kóteredi. Biz sııaqty elder ondaı azamatty "Jemqorlyǵy úshin túrmede otyrǵan shyǵar. Qazir kim jemeıdi? Jemeıtin adam tek jer astynda ǵoı" dep júre beredi. Sebebi, bizdiń qoǵam sondaı tehnokrat azamattardy emes, ánshiler men saıqymazaqtardy, saıqaldardy, arsyzdardy ǵana jaqsy tanıdy. Biz moıyndamaǵan aqıqat bireý ǵana. Ol - biz ózimizdi basqaratyn adamdarǵa saımyz, olar bizdi basqarýǵa saı. Bir birine týra proporıonal. Bizge áli uzaq ýaqyt kerek eken. Sony paıdalanǵan bular keshegideı birtúrli oıyndardy uıymdastyryp jatyr. Olar bizdiń birige almaıtynymyzdy bizden de jaqsy biledi. Qatty aıtsam keshirersizder.

Nazarbaev áýleti tolyǵymen bılikten ketpeı, Qazaq elinde ǵylym da, bilim de, órkenıet te joq.

 

Bekbolat QARJAN

"Adyrna" ulttyq portaly

Pikirler