Ár adamǵa tańdaý beriledi

141

"Adyrna" ulttyq-etnografııalyq birlestigi" QQ-y (Adyrna - ulttyq-etnografııalyq birlestigi ) "Azamattyq bastamalardy qoldaý ortalyǵy" KEAQ-nyń (CISC )memlekettik granty aıasynda QR Aqparat jáne qoǵamdyq damý mınıstrliginiń qoldaýymen júzege asyryla bastaǵan "Dástúrli rýxanı qundylyqtardy qoldaý jónindegi jumystardy uıymdastyrý" jobasy boıynsha semınar-trenıng uıymdastyrdy.
Tarıh, salt-dástúr jaıly ataýly shara Almaty oblysyndaǵy Úshqońyr medresesinde ótti.
Semınar-trenıngtiń dáriskerleri retinde Fılosofııa, saıasattaný jáne dintaný ınstıtýtynyń aǵa ǵylymı qyzmetkeri, PhD doktor, dintanýshy Dáýren Darııabek  jáne R.B. Súleımenov atyndaǵy Shyǵystaný ınstıtýtynyń kishi ǵylymı qyzmetkeri Arman Áýbákir rýxanı qundylyqtar jaıynda dáris oqydy. Dáris barysynda shákirtterdiń biri «adamnyń ózi qalaǵan jolmen júrýge tańdaýy bar ma, álde Alla taǵala ár adamnyń júrer jolyn áý bastan belgilep qoıa ma?» degen saýal qoıdy. Bul suraqqa dintanýshy Dáýren Darııabek: «Taraǵan hadısterdiń birinde «adam balasy dúnıege kelgen sátte Alla oǵan eki joldy, ıaǵnı durys jáne burys joldyń birin  tańdaýyna múmkindik beredi. Joldardyń qaısysyn tańdaý, ár damnyń óz erkinde. Aınalasyna tek jaqsylyq jasap, kúnáli isten aýlaq júretin durys joldy tańdaý da, kerisinshe, kúnáli isterge toly burys joldy tańdaý da adamnyń óz erkinde» ekeni aıtylady. Demek, ómirde qandaı joldy tańdaý, árkimniń óz enshisinde», dep túsindirip, jaýap berdi. Semınar-trenıngte medrese shákirtteri munan bólek ulttyq qundylyqtar men dinı máselelerge qatysty kókeılerindegi kóptegen suraqtarǵa jaýap aldy.
Shara sońynda aqparattyq-tanymdyq býkletter taratylyp, jastardyń dáristi qanshalyqty túsingenin anyqtaý maqsatynda shaǵyn saýalnama júrgizildi.

Merýert KEŃESBEKQYZY

"Adyrna" ulttyq portaly

Pikirler