Almaty turǵyndary joıqyn jer silkinisine daıyn emes

836

Sońǵy kezderi ınternet betterinen "Almatyda jer silkinisi boldy" degen aqparattardy jıi kóretin bolyp júrmiz. Tipten kúni keshe ǵana 7 qyrkúıek tańǵy saǵat 6:30 da "QR BǴM ǴK STÁE" MM seısmıkalyq stansalar jelisiniń habarlaýynsha 2-3 baldyq kórsetkishtegi jer dúmpýi tirkeldi. Iá, mamandardyń sózinshe san ǵasyrdy bastan ótkergen alyp shahar sońǵy 130 jylda eki ret tolyqtaı qırap, qaıta turǵyzylǵan. Alǵashqy jer silkinisi 1887 jyly bolyp, 236 adamnyń ómirin aıaýsyz jalmasa, 1910 jyly 44 adam qaıtys bolǵan. Ol jyldary qazirgideı kóp etajdy ǵımarattar joq edi. Dese de qıraǵan úıler sany 200 den asqan. Demek 2 ret oryn alǵan iri-iri jer silkinisinen keıin, az baldyq kórsetkishtegi dúmpýlerdiń qaıtalanýy bir sumdyqtyń belgisi sekildi. Bul jóninde ataqty orys arhıtektory "Bes etajdan bıik záýlim úıler salýǵa bolmaıdy" dese, Japon ǵalymy Segava Sıýke: «Eger sol kezdegi 9 balldyq jer silkinisi búgingi tańda oryn alar bolsa, Almaty qalasynda 25 000 ǵımarat qulap, 100 000-nan astam adam shyǵyny bolýy múmkin» deıdi. Rasymen bul sumdyq kórsetkish. Osyndaı jaǵdaı qaıta basqa túser bolsa saban men saz balshyqtan jasalǵan úılerdiń jaǵdaıyn elestetý tipten qorqynyshty.
Osy oraıda Almaty qalasynyń turǵyny Bıbibatıma Qadyrova óz feısbýk paraqshasyna "jer silkindi" degen taqyryppen post jazǵan. Posttyń astyna Áıkerim Qabdulhaqqyzy esimdi azamatsha "Tósek dir etkende, qasymda jatqan balam shyr etip jylady. Uıqym shaıdaı ashyldy. Eshtenege daıyn emes ekenimdi túsindim.." dep pikir bildirgen.
Betin aýlaq qylsyn, árıne! Zalal Arys apaty sekildi tań atpaı jatyp, mezgilsiz kelse baspanamyzdy emes, basymyzdy qalaı aman alyp qalarymyzdy bilmeı, del-sal kúıge túsetinimiz anyq. Yqtımaldylyqpen eseptesek, bul joly eki júz adam emes, eki mıllıon turǵyny bar Almaty qalasynyń eki myń adamynyń ómiri qyl ústinde tur. Sebebi saýatty arhıtektorlardy tyńdamaı, búgin salynyp, erteń betki sylaǵy túsip jatatyn sapasyz 10-20 qabatty úılerge senim joq. Seısmıkalyq ınstıtýtqa habarlasyp, jaýabyn ala almadyq. Sondyqtan tez arada Almaty qalasy Ulttyq seısmıkalyq ortalyq mamandarynan qanshalyqty halyqqa qaýip tónip turǵany týraly málimet berýin suraımyz.

 

Aqgúl AIDARBEKOVA

"Adyrna" ulttyq portaly

 

Pikirler