Aqynnyń jyry jańbyrsha jaýǵan kún

220

Teatr óneriniń órkendegen ordasy sanalatyn ákem teatrynda Farıza qoıylymy kórermen nazaryna usynyldy. «Teatr has sulýdyń kóz jasyndaı móldir óner» dep jazǵan Muhtar Áýezovtyń atyn ıemdengen Qazaq memlekettik akademııalyq drama teatrynda kópshilikke usynylǵan týyndyny «A+A Idea Fabric» prodıýserlik ortalyǵy daıyndaǵan. Jańa qoıylym jazǵy demalys kezinde teatrdy saǵynǵan almatylyqtar úshin aıtýly jańalyqqa toly boldy. Óıtken, sahnanyń bezendirilýi, dekoraııasy burynǵydan ózgerek árlengen. Máselen, sarqyrap aqqan sarqyramanyń sýynyń ózi áýenmen astasyp, qoıylymǵa tabıǵı reń berip turǵandaı.

Premera erekshe daryn ıesi, jany men táni jyr bop órilgen qazaqtyń dara qyzy, qaıtalanbas aqyny Farıza Ońǵarsynovanyń 80 jyldyq mereıtoıymen tuspa-tus keldi. Alǵashqy qoıylymnyń tusaýkeserine kórermen kóp jınalǵan. Sondyqtan teatrda ıne shanyshar oryn bolǵan joq. Tipti, osy jańalyqty barsha halyqqa jetkizetin tilshiler qaýymyna da oryn tabylmady. Aqyn rýhyna baǵyshtalǵan qoıylym Farızanyń jan tazalyǵy men qaısar minezin, óleńge degen mahabbatyn, ómirge kózqarasyn bildiredi. Tyń bastamalarǵa toly týyndyny kórýge akter Tuńǵyshbaı Jamanqulov, halyq ártisi Maqpal Júnisova, jazýshy Ákim Tarazı syndy qoǵam qaıratkerleri arnaıy shaqyrtylǵan. «Farıza» qoıylymynyń avtory halyqqa belgili aktrısa, Farızanyń kózin kórgen sińilisi Roza Muqanova. Al, týyndyny jaryqqa shyǵaryp, názik sezim ıirimin kópshilikke kórkem óner retinde jetkize bilgen Aınur Kópbasarova.

Tylsym kúshterdi baılanystyrǵan tosyn kórinister men tańsyq sheshimderden qoıýshy rejısser Farhat Moldaǵalıdiń qoltańbasy aıqyn kórinedi. Taǵdyrdyń tezindegi ónegeli ómirdi óleńmen árlep, Farızanyń jan tebirenisin, ishki álemin qoıylymmen baılanystyra bilgen kompozıtor Renat Gaısın eńbeginiń nátıjesi áserli áýennen ańǵarylady. Jańa formattaǵy týyndy Farızanyń ómir kezeńinen habar beredi. Óner adamynyń basyndaǵy ataq-dańq, satqyndyq, mahabbat, jalǵyzdyq sekildi máseleler bul qoıylymdy aınalyp ótpedi. Aqyn qyzdyń ómirinen syr shertetin týyndy kórermenderdi de beıjaı qaldyrmady. Farızanyń rólin somdaǵan jas aktrısa Nazgúl Qarabalına aqynnyń bolmysyn erekshe yqylaspen somdaǵan dep aıtýǵa bolady.

Qoıylym barysynda Farızanyń óleńderi jatqa oqylyp, aqıyq aqyn Muqaǵalı Maqataevpen rýhanı úndestigi de kórsetildi. Ómir men ólimniń arasynda sandalǵan Farızanyń jan tynyshyǵy tek óleńderi arqyly ǵana berildi. Týyndy sońynda aqynnyń óleńderi basylǵan aq paraqtar joǵarydan jaýǵan jańbyrdaı sebelep, Farıza óleńiniń árqashan halyq jadynda ekenin baıqatty. Sondyqtan, áli de bolsa kópshilik kórip úlgermegen qoıylymnyń sátti shyqqany talǵampaz kórermenniń qoshemeti arqyly belgili boldy. Halyq yqylasynyń tolastamaı uzaǵynan bolýy týyndynyń áserli shyǵyp, Farızanyń shynaıy bolmysy halyqpen jaqyn ekenin ańǵartady. Aldaǵy ýaqytta teatr maýsymy ashylǵanda kórermenniń bul qoıylymǵa suranysy ulǵaıa beretinine senimim mol.

 

Jaına ShYNBOLATQYZY,
Ál-Farabı atyndaǵy Qazaq Ulttyq
ýnıversıtetiniń magıstranty

Pikirler