726 myń dollar bólingen qalamgerler forýmy qalaı ótti?

574

El bıýdjetinen 281 mıllıon 35 myń teńge (726 myń dollar) bólingen Azııa elderi qalamgerleriniń forýmy biz tólegen salyqtan ketken shyǵyndy tolyǵymen aqtady. Qatysqan jazýshylar ne aıtaryn alda oqı jatarmyz.

Al bylaıǵy jurt osy qarajattyń arqasynda memlekettik syılyqtyń ıegeri Sábıt Dosanovtyń Nazarbaev áýletiniń qudasy bolǵandyqtan shabyty zoraıyp, kitap degenderin jyl saıyn topyrlatyp bastyryp jatqanyn Oljas kókem Súleımenovtiń baıandamasynan bildi. Qurmetti meıman retinde Mońǵolııadan arnaıy shaqyrylǵan, meniń dosym, kórnekti jazýshy Ǵunajaptyń balasy Aıýyrzan qazaqtyń halyq jazýshysy Qabdesh kókem Jumadilovke Shyńǵys hanǵa talasqany úshin "qol shyǵaryp", tarıh "pániniń emtıhanynan" omaqa asyryp qulatyp jiberdi.

Osynyń ózi nege turady? Qatarynan birneshe Forým ótkizip jiberýge bolatyn-aq dúnıe ǵoı. Taǵy bir maqtanyp aıtatyn nárse, Nobel syılyǵynyń laýraettary Mo Ian men Orhan Pamýk ózderinshe bolyp kelmeı qoısa da sol syılyq buıyrmaı qalǵan nomınanttardyń kelgeni de jáne bir sý jańa Forým uıymdastyrýǵa bolarlyqtaı oqıǵa boldy. Al kelesi Forýmdy Azııanyń ózge bir eli ótkizýge bizdikiler usynǵan estafedany talasyp-tarmasyp bas salyp, alýlary kerek edi. Olar  qulshynyp turǵan joq sekildi. Eshteńe etpes, araǵa úsh jyl salyp taǵy da ózimiz ótkize salarmyz dep tarqasqan sekildi ǵoı. Kózben kórgen jigitter aıta jatar.

 

Qýandyq ShAMAQAIULY

"Adyrna" ulttyq portaly

Pikirler