“Улану диагнозы анықталмады”. Ермұрат Бапи денсаулығы туралы айтты

12.09.2024

2427

https://adyrna.kz/content/uploads/2024/07/img_1396-960x500.jpeg?token=645a790db4327d4871d1ccf3c60219c3

Ермұрат Бапи денсаулығына байланысты шетелде ем алып, жағдайы туралы айтты, деп хабарлайды “Адырна” тілшісі.
Мәжіліс депутаты ютуб арнаға берген сұхбатында Еуропада 14 күн болғанын атап өтті. Алайда ол улануға қатысты диагноздың анықталмағанын хабарлады.
"Еуропада 14 күн, соның 10 күнінде клиникада болдым. Улану жөнінде ешқандай диагноз анықталмады. Улану деген блогерлердің, жекелеген интернет-ресурстарда айтылып кеткен әңгіме ғой. Мен емес, "жанашырларымның" аузынан шығып кеткен сөз. Дәрігерлер улануды дөп басып, анықтай алмады, уланудың элементтері ағзамнан табылған жоқ. Керісінше, "организмдегі препараттардың бір-бірімен қақтығысы" деген диагноз қойды. Дегенмен күдігім пайда болды, оған себеп дәрігерлердің пікірі болды. Себебі Астанада 40 жыл тәжірибесі бар дәрігер денеме шығатын ісіктерді көріп, мұндайды алғаш рет көріп тұрғанын айтты. Ал Германиядағы дәрігерім мүлдем тәжірибесінде болмағанын айтты. Дәрігерлердің осындай пікірін тыңдағаннан кейінгі күдік болды", - деді ол.
Журналистің “денсаулыққа қасақана қылмыс” істеуге қатысты қойған сұрағына:
"Бәріне жаға беретіндей 100 долларлық емеспін ғой. Біреуге ұнаймын, біреуге ұнамаймын. Біраз жасқа келдік қой. Түр-әлпетінен, іс-әрекетінен ұнатпай тұрған адамды бірден сеземін. Дегенмен ұнатпайтын адам осындай әрекет жасады деп айта алмаймын. Қолмен ұстап алмағаннан кейін "осылай болды" деп айтуға болмайды", - деп жауап берді депутат.
 