Жапонияның аэроғарыштық зерттеулер агенттігі Танэгасима ғарыш айлағынан H3 зымыран-тасығышын сәтті ұшырды, деп хабарлайды "Адырна" ұлттық порталы.
Бұл ұшыру елдің ғарыш бағдарламасы үшін маңызды кезеңдердің бірі саналады. Аталған миссияның ерекшелігі – H3 зымыраны дәстүрлі қатты отынды үдеткіштерсіз ұшырылды. Олардың орнына бірінші сатыға стандартты екі қозғалтқыштың орнына үш сұйық отынды қозғалтқыш орнатылған. Мұндай тәжірибелік ұшырылым инженерлерге зымыранның әртүрлі техникалық мүмкіндіктерін сынап, болашақтағы миссияларда қолдану аясын кеңейтуге мүмкіндік береді.
Бұл сынақ өткен жылғы сәтсіз ұшырудан кейін өткізілді. 2025 жылдың желтоқсанында H3 зымыранының бірінші сатысы қалыпты жұмыс істегенімен, екінші сатыдағы қозғалтқыш есептелген уақыттан бұрын тоқтап, миссия толық орындалмай қалған.
H3 – Жапонияның қазіргі кездегі ең ірі сұйық отынды зымыран-тасығышы. Оның ұзындығы 63 метрді, диаметрі 5,2 метрді құрайды. Нұсқасына қарай 4-тен 6,5 тоннаға дейінгі жүкті ғарышқа шығара алады. Ал жобаны әзірлеу жұмыстары 2013 жылы басталған.
