АҚШ-тың бірінші ханымы туралы «Мелания: Тарихқа дейінгі 20 күн» атты деректі фильм демалыс күндері прокаттан 7 млн доллар жинап, киноиндустрияны таңғалдырды. Бұл туралы NBC News жазды, деп хабарлайды "Адырна".
Amazon MGM Studios шығарған фильм Солтүстік Америкадағы 1500-ден астам кинотеатрда көрсетілді. Алғашқы болжам бойынша кассалық табыс 5 млн доллар шамасында болады деп күтілгенімен, фильм бұл межеден асып түсті. Сарапшылардың пікірінше, жоба соңғы он жылдағы ең табысты музыкалық емес деректі фильмдердің бірі атанды.
Демалыс күндерінің жалпы кассалық рейтингінде фильм ютубер Markiplier түсірген «Темір өкпе» және режиссер Сэм Рэймидің «Іштегі өзге ғаламшарлықтар» картиналарынан кейін үшінші орынға жайғасты.
Amazon MGM Studios дистрибуция бөлімінің басшысы Кевин Уилсон фильмнің сәтті басталуын атап өткенімен, компания үшін бұл әлі толыққанды жеңіс деп айтуға ерте екенін айтты. Себебі студия жобаны сатып алу үшін 40 млн доллар, ал маркетингтік науқанға шамамен 35 млн доллар жұмсаған. Мұндай шығын саяси деректі фильм үшін айтарлықтай жоғары деп бағаланып отыр.
Көрермендер фильмге жоғары баға берген. CinemaScore сауалнамасында картина А деген ең жоғары баға алса, Rotten Tomatoes платформасында оң пікірлердің үлесі 99%-ды құрады.
Кассалық табыс ең жоғары болған қалалар қатарында Даллас, Орландо, Тампа, Финикс, Хьюстон, Атланта және Уэст-Палм-Бич аталды. EntTelligence деректеріне сәйкес, демалыс күндері фильмді шамамен 600 мың көрермен тамашалаған. Көрермендердің басым бөлігі – әйелдер, олардың үлесі шамамен 70%.
Сонымен қатар, сын пікірлер де айтылды. The Hollywood Reporter басылымы фильмді «бірінші ханым туралы, бірақ оның өз бейнесін ашпайтын әрі қымбат үгіт-насихатқа ұқсайтын деректі фильм» деп бағалады.
Бұған дейін Ақ үйде жаңа «Мелания» деректі фильмінің жабық көрсетілімі өткені хабарланған еді.
