Түркістан қаласы 2025 жылы тек өндірістік емес, инфрақұрылымдық даму бағытында да айтарлықтай өзгерістерге куә болуда. Қала келбеті түбегейлі жаңарып, заманауи урбанистикалық модельге көшті.
Биылдың өзінде Түркістанда 250 гектар аймаққа көгалдандыру жұмыстары жүргізілді. Бұл экологиялық тепе-теңдікті сақтауға және қала микроклиматын жақсартуға бағытталған маңызды қадам. Сонымен қатар, қаладағы 772 гектар аумақ инженерлік желілермен қамтылды, бұл жаңа тұрғын үйлер мен әлеуметтік нысандардың құрылысын жеделдетуге мүмкіндік берді.
Тұрғын үй саясаты ерекше қарқынмен дамуда. 2025 жылы Түркістанда 350 мың шаршы метр тұрғын үй пайдалануға берілді. “Нұрлы жер” бағдарламасы аясында салынған жаңа ықшам аудандар - “Отырар”, “Бекзат”, “Яссы” - жас отбасыларға, бюджет қызметкерлеріне қолжетімді баспана ұсынуда. Сонымен қатар, инженерлік инфрақұрылымның толық жүргізілуі жаңа үйлердің сапасын арттырды.
Көлік логистикасы -Түркістанның стратегиялық артықшылығының бірі. Түркістан халықаралық әуежайының іске қосылуы және жаңа теміржол торабының кеңейтілуі өңірдің экспорттық әлеуетін арттырды. 2025 жылы Түркістан арқылы өтетін жүк легі өткен жылмен салыстырғанда 35%-ға көбейді. Бұл аймақты Орталық Азияның логистикалық хабына айналдыру жоспарының жүзеге асып жатқанын көрсетеді.
Қала ішілік жолдар да жаңарып келеді. 2025 жылы 120 шақырым жол жөнделіп, оның ішінде 40 шақырымы жаңадан салынды. Қала әкімдігі жол құрылысына заманауи материалдар мен экологиялық асфальт қоспаларын пайдаланып отыр.
Ауыз сумен қамтамасыз ету мәселесі де шешімін табуда. Қазірдің өзінде қала халқының 95%-ы орталық су жүйесіне қосылған. 2025 жылы “Кенжекөл” су тазарту станциясының жаңа желісі іске қосылып, қаланың шет аймақтарына дейін таза ауыз су жеткізілді. Сонымен қатар, кәріз жүйесін жаңғырту жұмыстары қарқынды жүріп жатыр - 60 шақырым жаңа құбыр тартылды.
Инфрақұрылыммен қатар, әлеуметтік сала да назарда. Жаңа мектептер, балабақшалар мен спорт кешендері салынып, халықтың өмір сапасы артты. Мәселен, биыл Әбдісалан Нұрмаханов атындағы спорт кешені ашылып, қала жастары үшін жаңа мүмкіндіктер есігін ашты.
Түркістан бүгінде тек тарихи және рухани астана емес, жаңа буынның заманауи қаласы ретінде қалыптасуда. Өнеркәсіп, тұрғын үй, логистика мен сумен қамту жүйесінің дамуы - осының бәрі Түркістанды елдің ең серпінді аймақтарының біріне айналдырып отыр.
