سيريا پرەمەر-ءمينيسترىنىڭ مىندەتىن اتقارۋشى مۇحاممەد ءال-باشير ەلدە ۋاقىتشا ۇكىمەتتىڭ قۇرامى جاساقتالعانىن مالىمدەدى، دەپ حابارلايدى "ادىرنا" ۇلتتىق پورتالى ريا نوۆوستي اقپارات اگەنتتىگىنە سىلتەمە جاساپ.
"ۋاقىتشا ۇكىمەت قۇرىلدى، ول "قۇتقارۋ ۇكىمەتىنىڭ" بىرنەشە مينيسترىنەن تۇرادى. بۇل ۇكىمەت 2025 جىلدىڭ ناۋرىزىنا دەيىن، كونستيتۋتسيالىق ماسەلەلەر شەشىلگەنگە دەيىن قىزمەت اتقارادى", – دەدى ول.
بۇعان دەيىن، سەيسەنبى كۇنى، ءال-باشير ءوزىن ۇكىمەت باسشىسى قىزمەتىنە تاعايىنداۋ تۋرالى مالىمدەگەن ەدى
ونىڭ ايتۋىنشا، ۇكىمەتتىڭ مىندەتتەرى – قاۋىپسىزدىكتى قامتاماسىز ەتۋ جانە مەملەكەتتىك ينستيتۋتتاردىڭ تۇراقتىلىعىن ساقتاۋ، ەلدىڭ ىدىراۋىنا جول بەرمەۋ جانە جاڭا كابينەت قۇرىلعانعا دەيىن ازاماتتارعا قىزمەت كورسەتۋ.
ءال-باشير بۇرىنعى ۇكىمەت مينيسترلەرىنىڭ كومەگىنە ءۇمىت ارتاتىنىن اتاپ ءوتىپ، ۇكىمەت الدىندا كوپتەگەن سىناقتار تۇرعانىن ايتتى.
'قۇتقارۋ ۇكىمەتى' قارۋلى وپپوزيتسيا تاراپىنان قۇرىلعان. ونىڭ بيلىگى يدليب پروۆينتسياسى مەن الەپپو پروۆينتسياسىنىڭ سولتۇستىگىندەگى قارۋلى توپتار باقىلاۋىنداعى اۋماقتارعا تارالعان. ال رەسمي سيريا ۇكىمەتىن پرەمەر-مينيستر مۇحاممەد عازي ءال-دجاليالي باسقارعان.
داماسك قارۋلى وپپوزيتسيانىڭ باقىلاۋىنا وتكەننەن كەيىن ءال-دجاليالي بىرنەشە مينيسترمەن ەلدە قالاتىنىن جانە قارۋلى وپپوزيتسيا باسشىلىعىمەن بايلانىس ورناتقانىن مالىمدەدى.
الدىن الا سيريادا بيلىككە كەلگەن توپتاردىڭ وكىلدەرى بيلىكتى تاپسىرۋ جانە انارحيانىڭ الدىن الۋ ماسەلەلەرىن تالقىلاعان. ۇسىنىلعان قادامداردىڭ ىشىندە بارلىق اسكەري توپتاردى تاراتىپ، ولاردى اسكەري وپەراتسيالاردى باسقارۋ باسقارماسىنىڭ قولاستىنا بىرىكتىرۋ تۋرالى ۇسىنىس ايتىلعان.
ەسكە سالا كەتەيىك، باشار اساد سيريادان قاشىپ كەتكەن ەدى. رەسەي سىرتقى ىستەر مينيسترلىگىنىڭ مالىمەتىنشە، پرەزيدەنت باشار اساد كەيبىر قاقتىعىسقا قاتىسۋشىلارمەن كەلىسسوزدەر جۇرگىزىپ، ءوز قىزمەتىنەن كەتۋ جانە رەسپۋبليكانى تاستاپ شىعۋ تۋرالى شەشىم قابىلداعان. بۇل كەلىسسوزدەرگە ماسكەۋ قاتىسپاعان.
كەيىنىرەك كرەملدەگى دەرەككوز ريا نوۆوستي اگەنتتىگىنە اسادتىڭ وتباسى مۇشەلەرىمەن بىرگە رەسەي استاناسىنا كەلگەنىن، گۋمانيتارلىق سەبەپتەرگە بايلانىستى ولارعا باسپانا بەرىلگەنىن حابارلادى.
